هنعمل ايه يوم الخميس

السلام عليكم ورحمة الله وبركاته

كل عام وانتم إلى الله أقرب وعلى طاعته أدوم

يوم الخميس هيكون يوم ذكرى المولد النبوى الشريف

( اللهم صلى على سيدنا محمد )

اكيد الاحتفال باليوم دة زى مالناس كلها بيحتفلوا بيه غلط

حلاوة المولد والهيصة وكل الحاجات اللى بنشوفها دية مش احتفال

بقة كل اللى بيمثلهولنا اليوم دة اننا ناكل حلاوة المولد وناخد اجازة و............. انا معرفش مظاهر الاحتفال اوى غير الحلاوة

فكرنا نعمل حاجة صح وناخد عليها ثواب ونظبط بيها حياتنا ونفرح بيها رسولنا عليه الصلاة والسلام

فكرنا ننصر نبينا وحبيبنا رسولنا وسيدنا عليه أفضل الصلاة والسلام من الملعونين اللى بيستهزؤا بحبيبنا

فكرنا ننصره .. نقاطعهم .. ننشر سنته
بيستهزؤا بحبيبنا لانهم ميعرفوش حاجة عنه ميعرفوش هوا اية بالنسبة لينا
مش كفاية مظاهرة .. ومقاطعة
نظبط من نفسنا .. ننصره جوانا الاول عشان نقدر ننصره قدام العالم كله
نتبع سنته نبعد عن اللى نهانا عنه نعرفه ونعرف سيرته ونكلم الناس كلها عنه


فكرنا كل سنة فى اليوم دة نصوم زى ماكان رسولنا الكريم عليه الصلاة والسلام كان بيعمل

عليه افضل الصلاة والسلام كان بيصوم اليوم دة ولما سألوه قال يوم ولدت فيه

(عن أبي قتادة الأنصاري ـ رضي الله عنه ـ أن رسول الله صلى الله عليه وسلم سئل عن صوم الاثنين ؟ فقال فيه ولدت ... )


تيجوا يوم الخميس نتفق مع بعض نشوف هنعمل اية

اية رأيكوا نصوم كلنا يوم الخميس

وكل واحد يفكر فى المعاصى اللى بيعملها ويكتبها فى ورقة ويحرقها بعد كدة

اوعوا تقع فى ايد حد

خلاص اتفقنا

طيب مش هنقدم هدية لحبيبنا وسيدنا محمد عليه الصلاة والسلام

ها هنقدم اية

احنا مش كتبنا معاصينا اللى بنعملها فى ورقة ... تيجوا نشطب على كام معصية كدة ونقول هديتنا لحبيبنا عليه الصلاة والسلام اننا نبطل المعاصى دى شوفوا باة غلاوته عندنا اد اية هنختار المعاصى الكبيرة ولا؟؟؟؟

واية رأيكوا كمان بعد منصوم ونبطل كام معصية تيجوا نقدم هديه كمان

طاعة جديدة ولا كام طاعة جديدة نعملهم نبتديهم من يوم الخميس

مثلا لو مش بنصلى الفجر نصليه .. قيام الليل .. الازكار .. المواظبه على الصلوات الخمسة فى اول الوقت وللرجال فى المسجد .. السنن الرواتب ...... فى حاجات كتير بس انتوا انووا

ها اية رأيكوا النهاردة اية فاضل كام يوم خلاص قربنا اوى

خلاص نوينا

اى حد عندوا فكرة تانية يقولهالنا علشان نتفق عليها كلنا

وحاجة كمان نتفق عليها نكثر من الصلاة على حبيبنا ورسولنا عليه أفضل الصلاة والسلام

"اللهم صلى على سيدنا محمد وعلى آل سيدنا محمد كما صليت على سيدنا إبراهيم وعلى آل سيدنا إبراهيم إنك حميد مجيد .. اللهم بارك على سيدنا محمد وعلى آل سيدنا محمد كما باركت على سيدنا إبراهيم وعلى آل سيدنا إبراهيم إنك حميد مجيد